Banda sonora

Dalguna nueche na que'l suañu tardaba 'n llegar podía sentir la mio respiración, el ruíu del sangre aportando al celebru y por más vueltes que diere y por más que tapase los oyíos nun yera quien dexar d'escuchar aquel soníu rítmicu aportando del mio propiu cuerpu, rebotando na almuhada. Ensin embargu agora sigo ensin escuchar nada, nesti pequeñu espaciu ríxidu, duru, onde permanezco tiesu, onde nun soi quien a moveme. Onde m'imaxino como al Cristu del Miserere na Selmana Santa de Zamora, na urna de cristal al costín de los penitentes arrodiáu d'un ensame de túniques blanques allumaes poles antorches entonando Miserere Mei, Deus, secundum magnam misericordiam tuam...quiciabes tamién seamos lo qu'oyimos, la banda sonora que punxo música a les nueses vivencies.¿Quién nun tien un canciu qu'al oyelu lu tresporte a otru tiempu,otru llugar, con otra xente?¿Cuálos son los mios recuerdos?¿Cuáles son les mios canciones?

Sigo ensin oyer un res, col fríu d'esti estrechu requexu conxelándome'l cuerpu, esforzándome 'n pensar, n'imaxinar los cancios de mio vida y con ellos los recuerdos, les vivencies. In the town where i was born lived a man who sailed to sea and he told us of his life n the land of submarines. Un Yellow submarine percorre la pantalla del televisor en blancu y negru, siendo'l mariellu namás qu'una referencia, una pallabra invisible, como les cares de los vietnamites enfrentándose a les tropes americanes mientres xinto'l puré agüeyando les escenes. Con unos grandes güeyos que descubren les imáxenes, los cancios, les crítiques del programa de cine con un paisanu falando con una peculiar voz del festival de Cannes y una rapaza ximielgando oxetos nel aire al ritmu de la so nariz ,a la que toos nomen embruxada.

Siento sonar una gaita y claro ta, siento sonar un tambor, voladores esnalando nel cielu, la h.oguera llevantándose no alto, les panderetes al son del ramu, les estrofes de la danza y pola nueche 'l canciu del branu repitiéndose nes fiestes, en toles fiestes, en tolos años un canciu de branu.

Nueches nes Escueles escuchando a Nuberu y Radio Futura, Los Secretos, Nacha Pop, Llan de Cubel. Nueches con arume a orbayu, a sidra moyando la herba, a herba quemando nel pitu, goliendo'l h.achís. Angie, Angie. When will those clouds all disappear? Angie,Angie. Where were the ladies from here? Colos Rolling ganándo-y la partida a los Beatles. Con Deep Purple sonando nel radiocasete nel bancu del parque, Highway Star de Made in Japan repitiéndose y rebobinando hasta romper la cinta mientres agüeyábemos nel cielu ximielgase les ñubes al son de los acordes de Money for Nothing de los Dire Straits, Now look at them yo-yo's that's the way you do it you play the guitar on the MTV, that ain't workin' that's the way you do it money for nothin' and chicks for free...

Nun soi quien a moveme,el fríu ca vegada ye más intensu, nun oigo , nun veo, nada. Delles vegaes al acostame pensaba qu'aquella sería la última nueche y si al principiu'l mieu me desvelaba, al final el suañu algamaba venceme y llevábame de la mano al so mundu, derrotáu, ensin fuerces, dexándome cayer nel mundu de los suaños, como'l canciu de Macaco. Sí, si esto ye'l purgatoriu y toi faciendo una confesión recordando cancios y con ellos la mio vida, ye verdá, escuché de too. A los payasos de la tele, Hola Don Pepito, a los artistes de moda d'aquelles dómines d'interminables nuechesvieyes onde dormía escuchando al balé rusu. Pero tamién a Macaco, Manu Chao, o Dark la eMe, pasando por Serrat, Javier Crahe o la Nova Cançó.

Sí, canté a Barón Rojo cola tiesta metía nuna hormigonera, bebí colos Stukas, fumé cola La Banda del Tren odié a Los Pecos, Miguel Bosé, Los Amaya, Umberto Tozzi, Bony M. , a La Pantoja, a Los del Río, a tola música que se convertía n'asquerosamente popular y mos arrodiaba en tolos requexos, na más escura discoteca o na más alonxada fiesta. Pero como casi toos acabé bailando un vals, anque'l que más me prestara oyéralu nel puertu ente la ñeve, baxo les estrelles, dándomos les diez y les once, les doce y la una, y les dos y les tres,y desnudos al anochecer mos alcontrara la lluna y acabara tatareando añaes y cancios de los Lunnis, asistiendo a conciertos virtuales de Hannah Montana y apigazando delantre'l televisor cola música de High School Musical y Camp Rock. Nun sé si seré culpable de daqué cosa, nun sé a qué respuende esti martiriu, esta situación, esti silenciu. Quixera dexar de pensar, como d'aquella cuando imaxinaba que sería la última nueche y nun m'importaba dormir creyendo qu'enxamás despertaría. Quiero dexar de pensar nos millones de cancios qu'escuché na mio vida y qu'agora s'agolpen nel mio maxín como si tuviere conectáu a un servidor remotu y youtube me bombardease a un canciu por segundu acompañáu de brincos, caricies, besos. Bebiendo a través d'un gran tubu llitros de coca, sidra, cerveza, güisqui nun cuartu emborrináu d'un fumu espesu, irrespirable, con arrecendor a inciensu, maría, faries, tubos d'escape. Nun sé si esto será l'infiernu, si l'infiernu tendrá banda sonora, si tolos que soñaron otros mundos cola Guerra les Galaxes , creyeron ser superhéroes como Superman o los gallos del baille 'n Grease o Saturday Night Fever pasarán per esto nestos momentos. Si esiste Diós,¿qué música escucha?¿Pa qué creó a los músicos? ¿Qué toi diciendo?

El fríu conxélame'l celebru, entamo pensar tonteríes.¿Por qué nun soi a moveme? ¿Por qué la escuridá sigue arrodiándome? ¿Ye esta la vida al otru llau de la muerte?

De sutrucu un resplandor ciega los míos güeyos faciéndome pesllalos, siento una mano.

_Síguime.

Dícenme tapándome'l cuerpu con una tela, tocándome l'hombru.

_ ¿A ónde?

_Llevántate. ¿Tas bien?

Nun puedo abrir los güeyos, la claridá adientra per ellos como l'aguya d'una xeringuilla inyectándo-yos dolor.

_¡Perdona!

_¿Quién me pide perdón?¿Nun soi yo'l que ta equí pa eso?

_¿Perdona?¿Qué dices? Abúltame que tienes un golpe na tiesta.

Llevo la mano a la tiesta y noto'l dolor, vuelvo sentir, adulces voi abriendo los güeyos y la so cara va dibuxándose delantre mio.¿Quién yes?¿Un ánxel?

_Casi, nun me tomes el pelu. De sobra sabes que soi Ánxela. Tienes que perdonamos, cola tormenta y l'apagón de lluz, con tola xente na peluquería, escaecimos que tabes na llámpara.

_¿Na llámpara?

_Sí,claru- dixo señalando alredor-.¿Duelte la tiesta?¿Mancaríeste más de la cuenta?

_Non, dexa. Apúrrime la ropa.

_¿Quiés tomar agora la sesión?

Nun contesto, llimítome a facer unos xestos mientres me visto. Agüeyo pa la llámpara, l'ataúd. La caxa lluminosa na que, apagada, tuviere metíu tou esti tiempu.Vuelvo acordame del personaxe d'Allan Poe.

GLORIA,
MANCHI TU NELL'ARIA
MANCHI ADUNA MANO
CHE LAVORA PIANO.
MANCHI A QUESTA BOCCA
CHE CIBO PIÙ NON TOCCA
E SEMPRE QUESTA STORIA
CHE LEI LA CHIAMO GLORIA