Selmana Santa de 1942, películes y música

En 1942 la Selmana Santa celebróse del 29 de marzu al 5 d'Abril, el domingu 12 d'abril proxectóse na sala Cinema de Sotrondio la película "La corona de hierro", que ganara'l premiu a la meyor película italiana nel Festival de Venezia de 1941, no qu'esi añu llamábase la Coppa Mussolini.
Durante la Selmana Santa los actos relixosos militarizaos protagonizaben esos díes y la música sacra sonaba nes emisores de radio.
España travesaba la posguerra y firmaba'l Pactu Ibéricu, en febreru de 1942, con Portugal. Un tratáu militar y territorial, nel que s'aceptaba por lusos y españoles les fronteres esistentes. L'oxetivu yera pacificar la península, non solo evitando un conflictu directu ente España y Portugal sinón asegurando la negación de sofitu a una tercer potencia en casu d'agresión a una d'estes. Tamién se buscaba la neutralidá na Segunda Guerra Mundial, pos la situación de dambos países yera precaria y nun podríen soportar entrar nel conflictu.

N'Europa la Segunda Guerra Mundial facía estragos y dende EE.UU preparábase l'ataque aéreu a Tokio del 18 d'abril. Una fuerza de 16 B-25 comandaos por James H. Doolittle despegaba del portaaviones Enterprise a  les 09:20 hores, y en percorriendo 850 milles, bombardea diez oxetivos en Tokio y dos en Yokohama seis hores dempués, finando 50 persones y causando escasos daños materiales. Los aviones, faltos de combustible, tienen d'aterrizar na China ocupada polos xaponeses, que van matar a miles de civiles buscando a los 80 tripulantes, 71 de los cualos sobreviven. L'ataque tien un gran impactu sobro la moral de norteamericanos y niponos, convenciendo al Conseyu Imperial de la necesidá d'atacar Midway, como entamara l'almirante Yamamoto.

Mientres, en fútbol, celebrábase la temporada 1941-42 de primera División . Foi la 11.ª edición de la máxima categoría del sistema de Lligues españoles de fútbol. Celebróse ente'l 28 de setiembre de 1941 y el 5 d'abril de 1942. Foi la primer edición que se disputó con catorce participantes, dempués d'aumentalos la Federación Española.
Naquella competición namás participó un equipu asturianu, el Real Oviedo C. F. , que quedaba n'onceava posición per delantre del C.F.Barcelona , los dos xugaríen la promoción de descensu a únicu partíu y mantendríense na categoría dempués de ganar el Real Oviedo C. F. por 3 - 1 al C. D. Sabadell C. F. , y el C. F. Barcelona por  5 - 1 al Real Murcia C. F.
Volviendo a la película ,"La corona de hierro" ,nel imaxinariu país de Kindaor, el malváu Sedemondo asesina al so hermanu, el rei Licinio, pa quita-y el tronu . Peracabáu'l so plan, Sedemondo atopa nel monte a una enigmática vieya que-y agora permales desgracies nel so nuevu reináu. Esmolecíu, el tiranu abandona nel valle de los lleones al pequeñu Arminio, fíu de Licinio, pero los feroces animales, en cuenta de matalu, críenlu como a unu d'ellos. Yá adultu, Arminio conoz a la moza Tundra, fía d'un rei traicionáu y derrotáu por Sedemondo, y alíase con ella pa reconquistar el so tronu. Mentanto, el traidor soberanu convocó a los meyores caballeros del reinu a un tornéu...

Invitámoste a viaxar nel tiempu calcando nes imáxenes, nuna puedes escuchar La Pasion segun San Mateo de J. S. Bach,y na otra podrás ver tola película que , fai casi ochenta años ,pudo vese na sala Cinema de Sotrondio en Samartín del Rei Aurelio.